മുംബൈ: ബോളിവുഡ് താരം രൺവീർ സിങ്ങിന് ഫെഡറേഷൻ ഓഫ് വെസ്റ്റേൺ ഇന്ത്യ സിനി എംപ്ലോയീസ് (FWICE) വിലക്കേർപ്പെടുത്തി. പ്രമുഖ സംവിധായകനും നിർമാതാവുമായ ഫർഹാൻ അക്തറിന്റെ ബിഗ് ബജറ്റ് ചിത്രമായ ‘ഡോൺ 3’യിൽ നിന്ന് താരം അവസാന നിമിഷം പിന്മാറിയതിനെ തുടർന്നാണ് നടപടി. തിങ്കളാഴ്ച മുംബൈയിൽ വിളിച്ചുചേർത്ത വാർത്താസമ്മേളനത്തിലാണ് സിനിമാ സംഘടനകളുടെ മാതൃസംഘടനയായ FWICE തങ്ങളുടെ അന്തിമ തീരുമാനം പ്രഖ്യാപിച്ചത്. രൺവീറുമായി ഇനി ആരും സഹകരിക്കരുതെന്ന കർശന നിർദേശമാണ് സംഘടന സിനിമാ മേഖലയ്ക്ക് നൽകിയിരിക്കുന്നത്.
45 കോടി രൂപ നഷ്ടപരിഹാരം ആവശ്യപ്പെട്ട് എക്സൽ എന്റർടൈൻമെന്റ്
ഫർഹാൻ അക്തറിന്റെയും റിതേഷ് സിദ്ധ്വാനിയുടെയും ഉടമസ്ഥതയിലുള്ള നിർമാണ കമ്പനിയായ എക്സൽ എന്റർടൈൻമെന്റ് കഴിഞ്ഞ ഏപ്രിലിൽ നൽകിയ പരാതിയെ തുടർന്നാണ് ഇപ്പോഴത്തെ നടപടികൾ. രൺവീർ സിങ്ങുമായി മൂന്ന് സിനിമകളുടെ കരാറിലാണ് കമ്പനി ഒപ്പുവെച്ചിരുന്നത്. ‘ഡോൺ 3’യുടെ ചിത്രീകരണം തുടങ്ങാൻ ദിവസങ്ങൾ മാത്രം ബാക്കിനിൽക്കെയായിരുന്നു താരത്തിന്റെ അപ്രതീക്ഷിത പിന്മാറ്റം. പ്രീ-പ്രൊഡക്ഷൻ ഇനത്തിൽ വലിയ തുക ഇതിനോടകം തന്നെ ചിലവഴിച്ചിട്ടുണ്ടെന്നും, ഈ വകയിൽ ഉണ്ടായ 45 കോടി രൂപയുടെ ഭീമമായ നഷ്ടം രൺവീർ സിങ് തന്നെ നൽകണമെന്നുമാണ് നിർമാതാക്കളുടെ ആവശ്യം. ഈ തുക നൽകി തർക്കം പരിഹരിക്കുന്നത് വരെ വിലക്ക് തുടരും.
അവസാന നിമിഷത്തെ പിന്മാറ്റം അംഗീകരിക്കാനാവില്ലെന്ന് FWICE
മുതിർന്ന താരങ്ങളുടെ ഇത്തരം പെട്ടെന്നുള്ള പിന്മാറ്റങ്ങൾ സിനിമാ വ്യവസായത്തിന്റെ നിലനിൽപ്പിന് തന്നെ ഭീഷണിയാണെന്ന് FWICE പ്രസ്താവനയിൽ വ്യക്തമാക്കി.
“സിനിമാ മേഖല എന്നത് ഒരു വലിയ കുടുംബമാണ്. വ്യത്യസ്ത മേഖലകളിൽ ഉള്ളവരുടെ കൂട്ടായ പരിശ്രമത്തിലൂടെയാണ് ഒരു സിനിമ ജനിക്കുന്നത്. പരസ്പര വിശ്വാസത്തിലും പ്രതിബദ്ധതയിലുമാണ് ഈ വ്യവസായം മുന്നോട്ട് പോകുന്നത്. എന്നാൽ ചിത്രീകരണത്തിന് തൊട്ടുമുമ്പ് മുതിർന്ന താരങ്ങൾ പ്രൊജക്ടുകളിൽ നിന്ന് പിന്മാറുന്നത് സിനിമാ മേഖലയുടെ സുസ്ഥിരതയെയും തൊഴിൽ അന്തരീക്ഷത്തെയും ദോഷകരമായി ബാധിക്കും.” – സംഘടന പ്രസ്താവനയിലൂടെ അറിയിച്ചു.
സിനിമാ മേഖലയെ തകർക്കാൻ ആരെയും അനുവദിക്കില്ലെന്ന് FWICE ചീഫ് അഡ്വൈസർ അശോക് പണ്ഡിറ്റ് വ്യക്തമാക്കി. “ഷൂട്ടിംഗ് തുടങ്ങാൻ 10 ദിവസം ബാക്കിയുള്ളപ്പോൾ സിനിമയിൽ നിന്ന് പിന്മാറുന്ന ഈ പ്രവണത തെറ്റാണ്. നാളെ ആർക്കും ഇതുപോലെ പകുതിക്ക് വെച്ച് ഇറങ്ങിപ്പോകാം. സിനിമാ വ്യവസായത്തിന്റെ നന്മയ്ക്ക് വേണ്ടിയുള്ള തീരുമാനങ്ങളുമായി മുന്നോട്ട് പോകും,” അദ്ദേഹം കൂട്ടിച്ചേർത്തു. സംഘടനയുടെ പ്രസിഡന്റ് ബി.എൻ തിവാരി, ജനറൽ സെക്രട്ടറി അശോക് ദുബെ, ട്രഷറർ ഗംഗേശ്വർലാൽ ശ്രീവാസ്തവ് എന്നിവരുടെ നേതൃത്വത്തിൽ ചേർന്ന അടിയന്തര യോഗത്തിന് ശേഷമാണ് വിലക്ക് പ്രഖ്യാപിച്ചത്.
ചർച്ച നിരസിച്ച് രൺവീർ സിങ്
പ്രശ്നം രമ്യമായി പരിഹരിക്കാൻ സംഘടന ആദ്യം മധ്യസ്ഥതയ്ക്ക് ശ്രമിച്ചിരുന്നെങ്കിലും, FWICE യുമായി ചർച്ച നടത്താൻ രൺവീർ സിങ് തയ്യാറായില്ല. ഇത് തത്തുല്യമായ മറ്റ് നിയമവേദികളിൽ കൈകാര്യം ചെയ്യേണ്ട വിഷയമാണെന്നാണ് താരം നിലപാടെടുത്തത്. എന്നാൽ ഇപ്പോഴും നടനുമായി ചർച്ചയ്ക്ക് തയ്യാറാണെന്നും, പ്രശ്നം സൗഹാർദ്ദപരമായി പരിഹരിക്കാൻ തങ്ങൾ തുറന്നുകാട്ടുകയാണെന്നും സംഘടന അറിയിച്ചിട്ടുണ്ട്.
നേരത്തെ പ്രൊഡ്യൂസേഴ്സ് ഗിൽഡ് ഓഫ് ഇന്ത്യയുടെ നേതൃത്വത്തിലും പ്രശ്നപരിഹാരത്തിന് ശ്രമങ്ങൾ നടന്നിരുന്നു. കോടിക്കണക്കിന് രൂപ പ്രീ-പ്രൊഡക്ഷനായി ചിലവഴിച്ച ശേഷമുള്ള പിന്മാറ്റം വലിയ പ്രതിസന്ധി ഉണ്ടാക്കിയതായി നിർമാതാക്കൾ ഗിൽഡിനെ അറിയിച്ചിരുന്നുവെങ്കിലും ചർച്ചകൾ ലക്ഷ്യത്തിലെത്തിയിരുന്നില്ല.
കഴിഞ്ഞ കുറച്ചു നാളുകളായി സിനിമയുമായി ബന്ധപ്പെട്ട് അപ്രതീക്ഷിതമായ പല കാര്യങ്ങളും സംഭവിക്കുന്നുണ്ടെന്ന് ഫർഹാൻ അക്തർ അടുത്തിടെ ഒരു അഭിമുഖത്തിൽ പ്രതികരിച്ചിരുന്നു. ഷാരൂഖ് ഖാൻ, പ്രിയങ്ക ചോപ്ര എന്നിവർ പ്രധാന വേഷങ്ങളിലെത്തിയ ‘ഡോൺ 2’വിന് ശേഷം ഫർഹാൻ അക്തർ സംവിധാനം ചെയ്യാനിരുന്ന ചിത്രമായിരുന്നു ‘ഡോൺ 3’. ആദിത്യ ധർ സംവിധാനം ചെയ്ത ‘ധുരന്ധർ: ദി റിവഞ്ച്’ എന്ന ചിത്രത്തിലാണ് രൺവീർ സിങ് ഒടുവിലായി അഭിനയിച്ചത്. ഭീമമായ തുകയുടെ തർക്കവും സംഘടനയുടെ വിലക്കും വന്നതോടെ രൺവീറിന്റെ സിനിമാ ജീവിതത്തിൽ ഇതൊരു വലിയ പ്രതിസന്ധിയായി മാറിയിരിക്കുകയാണ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
